Auk ráðgjafanna og verkefnastjórnar Vörðu, sem samanstendur af fulltrúum menningar- og viðskiptaráðuneytis og umhverfis, orku og loftslagsráðuneytis, var lykilhagaðilum boðið að taka þátt í vinnustofunum þ.e. umsjónaraðilum staðanna, fulltrúum sveitarfélaga, áfangastaðastofu Suðurlands og rekstraraðilum þar sem við átti.
Markmið vinnustofanna var að máta áfangastaðina við hugmyndafræði og viðmið Vörðu og að fá utanaðkomandi álit ráðgjafanna á ástand og þróun staðanna með hliðsjón af reynslunni í Frakklandi. Vinnustofurnar voru tvískiptar. Annars vegar var farið í vettvangsheimsóknir þar sem rýnt var í staðhætti, landslag, skipulag og innviðauppbyggingu og áhrif þessara þátta á upplifunina af stöðunum. Hins vegar voru haldnir vinnufundir þar sem leitast var við að móta sameiginlega sýn fyrir staðina til framtíðar.
Niðurstöður og tillögur ráðgjafanna eru aðgengilegar hér fyrir neðan. Þær munu nýtast í áætlanagerð sem mun hjálpa stöðunum að færast nær hugmyndafræðinni sem unnið er samkvæmt, þannig að þeir geti orðið Vörður innan ákveðins tíma.
Niðurstöður vinnustofa
→ Tillögur og niðurstöður um hugmyndafræði Vörðu→ Samantekt fyrir alla áfangastaðina→ Geysir - samantekt
→ Gullfoss - samantekt
→ Jökulsárlón - samantekt
→ Þingvellir - samantekt
Viðhorfskönnun meðal ferðamanna á áfangastöðum Vörðu
Menningar- og viðskiptaráðuneytið fól Rannsóknamiðstöð ferðamála að hafa umsjón með prufukeyrslu á viðhorfskönnun meðal ferðamanna við Geysi, Gullfoss, Jökulsárlón og í Þjóðgarðinum á Þingvöllum sumarið 2022. Rannsóknamiðstöðin útfærði einnig gagnaöflun fyrir könnunina.
Álagsstýring á ferðamannastöðum
Verkefnið er unnið að beiðni atvinnuvega- og nýsköpunarráðuneytisins sem samantekt á aðgerðum til álagsstýringar í ferðaþjónustu á Íslandi. Mikill árangur hefur náðst í að bæta aðstöðu á ferðamannastöðum á síðustu árum, bæði að frumkvæði stjórnvalda og einkaaðila. Til að bregðast við þeim áskorunum sem hröð fjölgun ferðamanna hefur í för með sér þarf hins vegar að skoða betur leiðir til virkrar álagsstýringar á ferðamannastöðum til þess að vernda náttúruna, bæta flæði, öryggi og upplifun. Í samantektinni má finna yfirlit yfir leiðir til að ná fram álagsstýringu, bæði þekktar leiðir og nýjar hugmyndir, sem geta nýst bæði stjórnvöldum og ferðaþjónustuaðilum.
Skýrslunni fylgir einnig viðauki með aðgerðum fyrir Gullna hringinn.
Áhugaverðir staðir á Gullna hringnum: Skráning myndastoppa
Menningar- og viðskiptaráðuneytið fól Vegagerðinni að gera greiningu á áningarstöðum ferðamanna á Gullna hringnum. Markmiðið var að fá heildstæða yfirsýn yfir staði á Gullna hringnum þar sem ferðamenn stoppa gjarnan til myndatöku og engin aðstaða er til staðar. Einnig var Vegagerðinni ætlað að leggja til fyrstu úrbætur að bættu flæði umferðar ferðamanna um svæðið og jöfnun á álagstoppum sem og að búa til grunn fyrir frekari úrbætur til framtíðar.
